Мэргэжлийн сүмо бөхийн Хару башё өнгөрсөн долоо хоногийн ням гарагт өндөрлөсөн билээ. Тус башёд нэг унаатайгаар Хахуко М.Даваажаргал түрүүлсэн билээ. Тэгвэл түүний ганц унааг Тэрүнофүжи Г.Ган-Эрдэнэ башёгийн 13 дахь өдөр өвдөг шороодуулсан.

Харин башёг дууссаны дараа сүмогийн холбооныхон хуралдаж 13 давааг авсан Тэрүнофүжи Г.Ган-Эрдэнийг тавдугаар сарын башёд 14 давж чадвал озэки цолыг шууд олгоно гэсэн болзол тавьжээ.

Хэдийгээр озэки цолыг сэкиваке цолтой бөх гурван башё дараалан нийтдээ 33 болон түүнээс дээш давсан тохиолдолд олгодог ч Тэрүнофүжид заавал гурван башё гэх болзол тавих хэрэггүй хэмээн үзсэн гэнэ. Учир нь Тэрүнофүжи ирэх башёд 14 давж чадвал түүний хоёр башёгийн даваа 27-д хүрч, улмаар Нагоя башёд ердөө зургаа давахад л озэки цол хүртэх болзлоо хангах юм.