Жүдо бөхийн олимпийн эрхийн оноо олгох Европын цуврал тэмцээн энэ сарын 20-22-ны өдрүүдэд Германы Дюсселдорф хотноо боллоо. Тэмцээнд 83 орны 740 гаруй жүдоч оролцсон юм. Манай улсаас “Дюсселдорф Гранпри” тэмцээнд дасгалжуулагч Х.Эрдэнэт-Од, Д.Баттулга нарын удирдлагад эрэгтэй, эмэгтэй бүтэн багаараа хүч үзэж, дөрвөн мөнгөн медаль хүртсэн амжилтаар VIII байрт оров.

Тодруулбал, эрэгтэйчүүдийн 66 кг-ын жинд өрсөлдсөн Д.Төмөрхүлэг, эмэгтэйчүүдийн 48 кг-ын жинд хүч үзсэн Гавьяат тамирчин М.Уранцэцэг, 57 кг-д Д.Сумъяа, 63 кг-д Ц.Мөнхзаяа нар тус тус мөнгөн медаль хүртлээ. Харин 100 кг-ын жинд барилдсан Хөдөлмөрийн баатар, Гавьяат тамирчин Н.Түвшинбаяр V, 73 кг-д Г.Одбаяр VII байр эзлэв.