БНСУ-ын Чежүгийн гран-при хэмээх томоохон тэмцээн амжилттай болж өндөрлөлөө. Уг тэмцээн нь олимпийн эрх олгох энэ оны сүүлийн томоохон тэмцээн юм. Тэмцээнд манай улсаас 13 эрэгтэй, таван эмэгтэй тамирчин Чежүгийн татамид зодоглосон. 100 кг-ын жинд хүч үзсэн Хөдөлмөрийн баатар, МУГТ  Н.Түвшинбаяр мөнгөн медаль хүртсэн бол, 60 кг-д Д.Амартүвшин, Г.Хэрлэн, 81 кг-д Н.Дагвасүрэн нар тус тус хүрэл медаль хүртсэн юм. Гурван хүрэл, нэг мөнгөн медальтайгаар манай баг тамирчид тэмцээний зургадугаар байрт шалгарсан байна.