Нийслэлийн Засаг даргын Санхүү, эдийн засгийн асуудал хариуцсан орлогч Н.Батаа Эстони Улсын нийслэл Таллинн хотноо зуун буудалт даамын өсвөрийн Дэлхийн аварга шалгаруулах тэмцээнд амжилттай оролцож мөнгөн медаль хүртсэн Б. Мөнхжин, 11 дүгээр байрт шалгарсан Б.Мишээл болон тэдний гэр бүлийнхнийг хүлээн авч уулзлаа. Монголын Даамын холбооноос ирүүлсэн хүсэлтийн дагуу Б.Мөнхжин, Б.Мишээл нарыг дэлхийн аварга шалгаруулах тэмцээнд оролцоход нийслэл дэмжлэг үзүүлж, санхүүгийн асуудлыг шийдвэрлэжээ.

 Уулзалтын үеэр нийслэлийн Засаг даргын Санхүү, эдийн засгийн асуудал хариуцсан орлогч Н.Батаа “Монгол Улсынхаа нэрийг тэр дундаа монгол хүүхдүүдийн оюуны чадамжийг дэлхийд харуулж, таниулсан бяцхан тамирчиддаа Хотын захиргааны нэрийн өмнөөс талархал илэрхийлье. Бид та бүхнийгээ дэмжиж, өнөөдөр ийм том амжилттай уулзаж байгаадаа таатай байна. Нийслэлээс баримталж буй бодлогын хүрээнд тив, дэлхийн тэмцээн уралдаанд оролцох  спортын тамирчдад бид өөрсдийн боломжоороо туслахад бэлэн байгаа” гэдгийг тодотгон хэллээ. Дэлхийн аваргын мөнгөн медальт 10 настай Б.Мөнхжин ихэр бөгөөд түүний ихэр нь ч даамын спортоор хичээллэдэг. Харин Монголын хамгийн отгон мастер 14 настай Г.Хэрлэнмөрөн тэдний багшаар ажилладаг юм байна.