Улсын наадамд таваас дээш давсан бөхчүүдийг сэргээшийн шинжилгээнд хамруулж, сорьцыг нь БНСУ-ын Шинжлэх ухаан технологийн хүрээлэнгийн Допингийн төв лабораторид хүргүүлдэг. Энэ жилийн хувьд мөн  сорьцыг хүргүүлж шинжлүүлсэн бөгөөд энэ талаар өнөөдөр Монголын үндэсний бөхийн холбооноос мэдээлэл хийжээ. Энэ жилийн хувьд хоёр бөхөөс допинг илэрсэн нь тогтоогдсон байна. Тодруулбал  Улсын наадамд тав давж начин цол хүртсэн Архангай аймгийн харъяат, аймгийн хурц арслан Н.Адъяабат, Говь-Алтай аймгийн харъяат, аймгийн арслан Б.Суманчулуун нар допинг хэрэглэсэн нь батлагджээ.