Мэндчилгээ

Монголын орчин цагийн сэтгүүлзүйн хөгжилд цоо шинэ хуудас нээсэн цахим сэтгүүлзүй нь түүхээ бичиглэж эхлээд цөөхөн он өнгөрч байгаа ч үндэсний сэтгүүлзүйн хөл дээрээ баттай зогссон хүчирхэг салаа мөчрийн нэг болоод байгаад Монголын Сэтгүүлчдийн Эвлэл сэтгэл туйлын хангалуун байдаг билээ.

Богинохон хугацаанд төлөвшиж буй энэхүү хил хязгааргүй сэтгүүлзүйн зөв хөгжилд төрөлжсөн сайтууд онцгой үүрэг гүйцэтгэж буйн нэг нь URLAG.MN сайт юм. Энэ өдөр 5 жилийнхээ ойг тэмдэглэж буй URLAG.MN сайт нь өнгөрсөн хугацаанд Монголын соёл, урлагийн амьдралтай холбоотой мэдээ мэдээллийг хамгийн өргөн хүрээнд, хамгийн түргэн шуурхай хүргэн мэдээлдэг үндэсний хэмжээний томоохон сайт болж чадсан нь тус хамт олны нөр их хичээл зүтгэл, мэргэжлийн ур чадвар, сэтгүүлзүйг шинэ технологитой хослуулан амжилтад хүрч чадаж буйн илэрхийлэл юм.

Монголын урлаг соёлын амьдралын гэрэл сүүдэр, амжилт ололт, өчигдөр өнөөдөр, алдаа дутагдлын талаарх мэдээ мэдээллийг цаг алдалгүй нийгмийн анхаарлын төвд хүргэж чаддаг учраас тус сайтад өдөр бүр мянга мянган хэрэглэгч ханддаг билээ. Уншигч хэрэглэгчдийг мэдлэг мэдээллээр хангах, цахим орчин дахь гүүр нь байх үүргээ тус сайт сайн биелүүлэхийн зэрэгцээ урлаг соёлын чиглэлээр үйл ажиллагаа явуулдаг албан байгууллага, хувь хүмүүсийг ямагт дэмжсээр ирснийг талархан тэмдэглэж байна.

URLAG.MN сайт нь Монголын Сэтгүүлчдийн Эвлэлийн үйл ажиллагаанд идэвхтэй оролцож, Монголын хэвлэл мэдээллийн салбарынхны үндэсний их наадмыг хамтран зохион байгуулж, уг арга хэмжээг тогтмолжуулах, нэр хүндийг нь өсгөхийн төлөө гаргаж буй идэвх зүтгэлийг нь энэхүү ойн өдөр онцлон дурдаж талархахыг хүсч байна.

Та бүхнийг урлагийн агуу тэнгэр ямагт ивээж, олон олон он жилийг үр бүтээлтэй үдэж, Монголын сэтгүүлзүй, тэр дундаа цахим сэтгүүлзүйн манлайлагч нь байхын ерөөл дэвшүүлье.

МОНГОЛЫН СЭТГҮҮЛЧДИЙН ЭВЛЭЛИЙН ЕРӨНХИЙЛӨГЧ,
МОНГОЛ УЛСЫН СОЁЛЫН ГАВЪЯАТ ЗҮТГЭЛТЭН Б.ГАЛААРИД