Дэлхийн хамгийн алдартай шоуны нэг Got talent шоу Азид зохион байгуулагдаж байгаа бөгөөд Asia s got talent шоу нь энэ оны 3 дугаар сарын 12-ноос AXN телевизээр Азийн 20 гаруй улс оронд зэрэг цацагдаж эхэлсэн билээ. 

Тус шоунд Азийн улс орнуудаас мянга мянга оролцогчид ирж оролцсоноос "Хөсөгтөн" хамтлаг  сая сая үзэгчид болоод эрхэм шүүгчдэд Монгол ардын урлагийн гайхамшгийг мэдрүүлж тэднийг бишрүүлээд авсан бөгөөд шүүгчдээс санал нэгтэйгээр "Тийм" гэсэн үнэлгээг авч хагас шигшээд шалгаран үлдээд байсан билээ.

 Тэмцээний ялагч  $100.000 ам.долларын эзэн болохоос гадна Сингапурын “The Marina Bay Sands” зочид буудалд тоглолтоо хийх эрхийг авах юм. Шоуны шилдэг 9 оролцогчийг шалгаруулах санал асуулга 23-27-ны хооронд явагдсан бөгөөд санал асуулгын дүн өчигдөр орой олон нийтэд ил болж "Хөсөгтөн" хамтлаг маань шилдэг 9-д үлдэж чаджээ. Монгол үндэсний язгуур урлагаа дэлхий нийтэд сурталчилж, монголынхоо нэрийг гаргаж байгаа "Хөсөгтөн" хамтлагаар Монголчууд бид бахархаж байна. "Хөсөгтөн" хамтлагаа уг шоу тэмцээнд шилдэг нь болж бахдам их амжилтыг үзүүлээрэй хэмээн элэг нэгт Монголчуудын зүгээс хүсэн ерөөе...