“Х-ТҮЦ” продакшны хамт олон ирэх оны нэгдүгээр сард “Танхай тээгч” гэх содон нэртэй уран сайхны киногоо үзэгчдийн хүртээл болгоход бэлэн болжээ. Тус киноны зохиолыг бичиж, найруулагчаар нь ажилласан Монгол Улсын гавьяат жүжигчин И.Одончимэгийг энэ удаагийнхаа “Уран бүтээлч” уландаа урилаа. Ингээд түүнтэй шинэ киноных нь талаар цөөн хором ярилцсанаа хүргэе.

-Юуны өмнө танд энэ өдрийн мэнд хүргэе. Тантай уулзалгүй их уджээ. Сүүлийн үед уран бүтээлийн олз омог их байгаа сурагтай?

-Өө, маш их баярлалаа. Он дөнгөж гаргаад “Танхай тээгч” уран сайхны киногоо үзэгчдийн хүртээл болгохоор бэлдэж байна.

-Таныг зохиолоо бичиж, найруулахаас гадна өөрөө гол дүрд нь тоглосон гэж сонссон юм байна?

-Тийм ээ, киноныхоо гол дүрд би өөрөө болон жүжигчин Амбий, Т.Бархүү, Долгор нар тоглосон. Миний хувьд өөрийнхөө хэмжээнд, боломжоороо л дүрээ бүтээлээ.

-Анхнаасаа л та өөрөө гол дүрд нь тоглоно гэж бодож зохиолоо бичсэн үү?

-Үгүй ээ. Уг нь өөрийнхөө дүрд өөр хүн тоглуулахыг хүссэн. Янз бүрийн жүжигчдээс сонголт хийх боломж байсан. Харин манай Бараа “Чи өөрөө тогло. Тэд чиний бодсоноор тоглооч уу, үгүй ч үү” гэж хэлсэн. Тэгээд л өөрөө тоглохоор шийдсэн.

-Сэдвийн хувьд их өвөрмөц юм. Киноны нэр нь хүртэл “Танхай тээгч” шүү дээ?

-Тийм ээ. Монголын кино урлагт өмнө нь ийм сэвдийг хөндсөн кино хийгдэж байгаагүй. Зориуд энэ сэдвийг сонгосон. Баримтат кино үзэж байгаад гэнэт ийм санаа төрсөн л дөө.

-Удахгүй үзэгчдийн хүртээл болох энэхүү киногоороо дамжуулж үзэгчдэд, олон нийтэд ямар мессэж өгөхийг зорьж байгаа вэ?

-Сэдэв маань энэ нийгэм, тэр дундаа зарим нэг гэр бүлийн хувьд их сонин л доо. Монголд цөөн тооны тээгч эх нар байдаг. Тээгээд төрүүлчихсэн хүүхдүүд ч бий. Гэхдээ үүнийг нэг их олон нийтэд дэлгээд байдаггүй. Тэр болгон сонин, хэвлэлээр ярьдаггүй. Тэгсэн атлаа Монголд үйл ажиллагаа нь явагдаад эхэлчихсэн байна шүү дээ. Кино зохиолоо бичихийн тулд маш их судалгаа хийсэн. Олон ч хүнтэй уулзсан. Сонирхолтой нь хамгийн хямдхан тээгчид Монголд л байдаг юм билээ. Дараа нь Энэтхэг. Харин бусад оронд бол өндөр үнэтэй. Судалгаагаа хийж явахдаа сонин, содон зүйл их сонссон. Гэхдээ киногоо үзэгчдийн хүртээл болсны дараа илүү дэлгэрэнгүй ярих нь зөв байх.

-Тэгэлгүй яах вэ, та тэгж бодож байгаа бол шүү дээ. Зураг авалт хэдий хугацаанд үргэлжлэв?

-Кино зураг авалт маань өнгөрсөн нэг, хоёрдугаар сард хийгдсэн. Сар гаруй хугацаанд үргэлжилсэн.

Таныг зохиолоо бичиж байхдаа л жүжигчин Амбийг тоглуулна гээд төлөвлөчихсөн байсан гэх юм билээ?

-Тийм ээ.

-Яагаад?

-Амбий маань ярьдаг байсан л даа. Хоёулаа нэг кинонд тоглох юмсан гэж. Уг зохиолоо бичихдээ чиний хэлснээр үнэхээр Амбийг тоглоно гэж бодож бичсэн. Тэгээд ч бид хоёр портнёр болж тоглож үзье гэж ярилцсан. Кино зохиол маань уран бүтээлчдэд маш их таалагдсан.

-Өмнө нь та хэд хэдэн жүжгийн зохиол бичиж байсан. Харин “Танхай тээгч”  уран сайхны киноанхны тань кино зохиол уу?

-Үгүй. Өмнө нь “Сэргээш-3”-ын зохиолыг бичиж байсан. Бас хэд хэдэн кино зохиол дээр хамтран ажиллаж байсан.

-Ингэхэд зохиолоо хэдий  хугацаанд бичиж дуусгав?

-Харьцангуй богино хугацаанд гарсан. Магадгүй өшөө их суусан бол илүү сайн зохиол гарах байсан байх.

-Уучлаарай, санаанд тань нэг л хүрээгүй юм аа даа?

-Ямар ч хүн өөрийнхөө зүйлийг голж байдаг. Гэхдээ яах вэ, боломжийн кино зохиол болсон. Уран бүтээлч хүн тоглох юмтай гэж бодож байна.

-Тантай уулзсаных нэг зүйлийн талаар асуулгүй өнгөрч болохгүй байх?

-Юу тэр билээ. 

-Та “Зүрх бүхний төлөө” аянд оролцож ард түмнээс өндөр үнэлгээ авлаа шүү дээ?

-Баярлалаа. “Мобиком” корпорацийн санаачлага л даа. Тэд нийгмийн хариуцлагаа ухамсарлаж, ийм аян өрнүүлсэн. Ингэхдээ олны танил хүмүүсээс таван хүнийг сонгохоорсудалгаа хийсэн гэсэн. Тэрхүү судалгаагаар нь би сонгогдож, надад санал тавьсан.

-Таны хувьд нийгмийн хариуцлагаа хэр сайн биелүүлж, ухамсарладаг вэ?

-Би уран бүтээлч хүн. Уран бүтээлээрээ дамжуулж нийгмийн хариуцлагаа ухамсарлаж, биелүүлж яваа гэж боддог. Яг гар бие оролцож, халуун цэгт нь очиж ажиллана гэдэг хэцүү л дээ. Тэр тусмаа уран бүтээлч хүний хувьд цаг завгүй байдаг. Гэхдээ гар бие оролцох боломж надад олгосонд баярладаг. Хүнд сэтгэл байвал ямар ч зүйлийг хийж, бүтээж чадна. Ямар сэдэв барьж авах вэ гэдэг нь миний өөрийн бодол болж үлдсэн. Ганц би ч биш бусад оролцогч маань ч гэсэн өөр өөрсдийнхөө төслийг боловсруулсан.

-Аяны ялагч болж 80 сая төгрөг авсан. Энэ мөнгө таны бодож, төлөвлөсөн зүйлд тань хүрсэн үү?

-Тэгэлгүй яах вэ, 80 сая төгрөг маань их ашигтай зарцуулагдсан. Газар, байшин, төмрөн хашаа, автобустайгаа багтана гэдэг бол хэцүү. Гэхдээ л чадсан. Энд илүү харж, билүү долоосон зүйл огт байгаагүй. Энд маш олон хүний сэтгэлийн дэм орсон гэдгийг зориуд тодотгож хэлэх хэрэгтэй. Энгийн жишээ л гэхэд  хашаа, байшин барьж өгсөн компани маань хамгийн хямд үнээр хамгийн чанартайг хийж өгсөн. Энэ мэтчилэн янз бүрийн компаниуд, хувь хүмүүсийн сайхан сэтгэлийн хүчээр төсөл маань биелэлээ олсон.

-Сургууль тань хэдэн хүүхэд хүлээж авах боломжтой вэ?

-Эхний ээлжинд 50-аад хүүхэд хүлээж авах хүчин чадалтай. Харин эрэлт, хэрэгцээ их байвал 100 хүртэлх хүүхдийг дөрвөн ээлжээр хүлээж авна. Ирэх нэгдүгээр сараас эхлэн Англи, Солонгос гэх мэт хэлний сургалтуудыг хичээллүүлэх бодолтой байна. Анх энэ их мөнгийг сэтгэлийнхээ хөөрлөөр ч юм уу, үр ашиггүй үрэхийг бодоогүй. Тийм ч учраас ямар нэгэн эзэнтэй юм түших ёстой гэж бодсон. Би байнга тэнд ажиллана гэж байхгүй. Тэгэх ч боломжгүй. Тиймээс миний үндэс, суурийг нь тавьсан зүйлийг цааш нь аваад явчих хэмжээний сэтгэлтэй, зүтгэлтэй, хариуцлагатай хүн хэрэгтэй байсан. Тийм хүн олно, сонгоно гэдэг бол хэцүү шүү дээ.

-Саяхан УИХ-ын эмэгтэй гишүүд жүжигчин Ундармаа та хоёрыг хүлээж авч уулзсан. Цахим ертөнцөд уран бүтээлчид ийм буянтай, сайхан ажил хийж байхад УИХ-д сонгогдсон эмэгтэй гишүүд юу хийж байна вэ гэх зэргээр харьцуулж байсан. Үүнийг та хэрхэн хүлээж авсан бэ?

-Тэд бид хоёрыг их дэмжсэн. Сэтгэл санааны хувьд ч тэр. Нийгэмд үлгэр дуурайлал үзүүлж, сайн сайхан үйлсийн төлөө ингэж явж байгаад талархал илэрхийлсэн. Надад бол сайхан л санагдсан. Гэхдээ эмэгтэй гишүүд огт юм хийхгүй байгаа биш шүү дээ.Тодорхой хэмжээнд хийж байгаа. Тэр нь одоохондоо нүдэнд харагдахгүй, чихэнд сонсогдохгүй байж болно. Гэхдээ тэдэнтэй уулзаад би нэг л зүйлийг бодож байлаа.

-Юу тэр вэ?

-Парламентад 11 эмэгтэй гишүүн хэтэрхий цөөхөн байна. Гэхдээ эмэгтэйчүүдийг олноор нь оруулах ёстой гэсэн асуудал биш л дээ. 76 дотор 11 гээд бод л доо. 65 нь эрэгтэй гишүүд байгаа биз дээ. Ямар ч логикоор бодсон эмэгтэй хүн л амин чухал хэрэгтэй зүйлийг олж, мэдэрдэг. Тэдний бодож, төлөвлөсөн зүйлийг эрэгтэй гишүүд нь няц дардаг байхыг үгүйсгэхгүй. Тэд эмэгтэй гишүүдээ сургууль, цэцэрлэг, эмнэлэг ярихаар “Та нар тулга тойрсон юм ярилаа” гэж загнадаг гэж байгаа шүү дээ.

-Уучлаарай, таны ярихыг сонсоод яагаад ч юм нэг зүйлийг зориуд асуумаар санагдчихлаа?

-За, асуу  л даа.

-Та улстөрд орох боломж, нөхцөл нь бүрдвэл улстөрд орох уу?

-Үгүй.

-Яагаад?

-Надад миний хийж байгаа ажил маань хангалттай. Би аз жаргалтай амьдарч байна. Хүн өөрийнхөө дуртай зүйлийг л хийх ёстой. 

-Сайхан хариулт байна. Ярилцсанд баярлалаа.