Өнөөдөр Монгол Улсын ардын жүжигчин, Төрийн шагналт, Зууны манлай морин хуурч Гомбодоржийн Жамъян агсны мэндэлсний 95 насны ой тохиож байна. Ойн хүрээнд Г.Жамъян агсны үр хүүхдүүд болон “Жамъян” сан, нийслэлийн Соёл, урлагийн газар, Улсын дуурь, бүжгийн эрдмийн театр, Соёл урлагийн их сургууль, Хөгжим бүжгийн коллеж хамтран ДБЭТ-ын тайзнаа өнөөдөр “Хүндэтгэлийн тоглолт” зохион байгуулах гэж байна. Тоглолтод Үндэсний дуу бүжгийн эрдмийн чуулга, Монгол Улсын “Морин хуур”-ын чуулга, Улаанбаатар чуулгын уран бүтээлчид оролцоно. Түүнчлэн тоглолтонд Г.Жамъян агсны ач нар нь болох энэ цаг үеийн рок, попын томоохон төлөөлөгчид болох "Камертон хамтлагийн ахлагч Төрийн соёрхолт Д.Болд, "Никитон" хамтлагийн дуучин Б. Батчулуун нар оролцох юм.