Алхам бүр нь компьютержсэн энэ эринд нүдээ хамгаалах хэцүү болжээ. Хэрэв таны нүд амархан ядарч, улайж, загатнадаг бол тэр нь хэт их ачаалал авснаас болоод чийгшилгүй болж буйн шинж юм. Та дараах зөвлөгөөнүүдээс хэрэгжүүлснээр нүдээ амрааж чадна.

1. Тогтмол завсарлага авч бай. Хэрэв таны нүд компьютер, зурагтнаас болж ядардаг бол 20 минут тутамд нүдээ дэлгэцнээс өөр зүйлд хандуулаарай. Өөрөөсөө 20 тохой хэмжээний зайд байгаа ямар нэг зүйл рүү 20 секунд харахыг зөвлөж байна. Эсвэл ийм хугацаанд сандал дээрээсээ босч цай уун, хамтран ажиллагч дээрээ очиж хэдэн үг солиод авсан ч болно. Ямартай ч та цацрагт дэлгэцнээс ходож нүдэндээ чийгшлээ нөхөх боломжийг олгох ёстой юм. Олон дахин цавчлах нь ч бас нүдний алимыг тосолж өгдөг.
2. Өдөрт 1-2 удаа нүднийхээ зовхины гадна талаас хурууныхаа өндгөөр зөөлөн иллэг хийж өг. Нүцгэн гараар, эсвэл бүлээхэн алчуураар хийж болно. Дээд зовхи, доод зовхи, хөмсөгний булчингийн ойролцоо хэдэн минут тойрог хэлбэртэйгээр массажлана. Энэ нь ачаалал авсан нүдний булчингуудыг суллаж, нулимсны булчирхайг идэвхжүүлж, хуурайшиж, загатналыг арилгах болно. Массажийг аль болох харанхуй өрөөнд хийхийг хичээгээрэй.
3. Нүдэнд массаж хийх өөр нэг арга. Хоёр алгаа хооронд нь хавсарч, халуун илч ялгартал нь үрээд, хангалттай халуун болсон нэг алгаа дотогш нь хонхойлгож, бөмбөгөр болгож байгаад, нэг нүднийхээ дээр тавина. Алганы халуун буутал байлгаад авна. Энэ үйлдлийг нөгөө нүдэндээ ч бас хийнэ.
4. Нүдэндээ хүйтэн жин тавь. Хүйтэн температур нь хавдсан нүдийг тайвшруулна. Хүйтэн жингийн оронд хөргөчинд байлгасан халбага, хэрчсэн өргөст хэмх, хөргөсөн дүрдэг цай ч тавьж болно. Цэл хүйтэн мөс тавихаас болгоомжил. Таны арьсыг гэмтээж болзошгүй.
5. Таны ажлын өрөөний болон гэрийн гэрэл хир тод вэ? Бүдэг, сулхан гэрэлд юм хийх нь нүдийг маш амархан ядрааж орхидог. Үүний оронд эсрэгээрээ тас харанхуй өрөөнд суусан нь дээр. Өдөрт 15 минут харанхуй өрөөнд суух нь нүдийг мөн амраах ач холбогдолтой.
6. Нүүр рүүгээ 3-5 удаа хүйтэн ус цац. Ус цацаж байхдаа нүдээ анихгүй байхыг хичээгээрэй. Ингэвэл ус таны нүдийг угааж, чийгшүүлнэ.
7. Хэрэв таны нүд огцом ядраад эхэлвэл эргэн тойрондоо байгаа ногоон өнгийн зүйл рүү удаан хараарай. Энэ өнгө таны нүдийг тайвшруулна. Эсвэл зүгээр л тэр дороо хэдэн секунд нүдээ аньчих.
8. Долоовор хуруугаа гозойлгож нүүрнийхээ өмнө барьж байгаад, аажмаар хамарныхаа үзүүр лүү ойртуул. Ингэхдээ нүдээ хуруунаасаа бүү салгаарай. Хамарны үзүүрт хүрмэгцээ хурууг холдуулаад, алсын зүйлийг хэдэн секунд ширт.
9. Өөрийнхөө зүүн талд байгаа зүйл рүү хар. Харсан чигтээ толгойгоо баруун тийш эргүүл. Энэ үйлдлийг эсрэг зүгт мөн адил давтагтун.