Юун түрүүнд өөртөө хүнд хүчир, нүсэр зорилго тавихын оронд зүгээр л энгийн хялбарханаас нь оролд. Герман хэлний орчуулагч Жудит Мацын зөвлөгөө: “Эхний ээлжинд сурах гэж буй хэлнээсээ тавин үгийг яг таг цээжил, мөн түүнийгээ ямар нэгэн байдлаар ашигла. Дараа нь аажмаар дүрмийн хичээлдээ цаг гаргаарай...”

27 жил Англи хэл заасан багш Элизабет Буффар амжилттай сурагчдаасаа нэгэн том ялгааг олж харсан гэнэ. Юу вэ гэхээр, хэл сурахыг хичээж буй хэн ч бай хаана ч бай тухайн нөхцөл байдалд тухайн хэлтэй холбоотой зуршлыг бий болгох явдал байсан юм. Ядарсан, өвдсөн магадгүй бүр дурласан байхдаа ч хүртэл үйлдэл бүрийгээ тухайн хэлээр хэрхдэг болохыг олж мэдэхийг хичээх нь зүйтэй.

Өдөр тутмын амьдралдаа тухайн хэлийг хэр их шингээнэ, төдий чинээ таны тархи улам цэнэглэгдэж шинэ соргогыг хүлээн авах болно. Орос хэлний орчуулагч Ольга Дмитроченкова хэлэхдээ “Шинэ хэл сурахад тань үл ялиг ч болтугай нөлөөлж чадах боломжуудыг ашигла. Гэрийн өнцөг булан бүрээ тухайн хэлээрээ илэрхийл, хүүхдийн энгийн үгтэй ном унш, доороо хадмалтай “TEDx” - ийн лекцүүдийг ч гэсэн үзэж сонирхсон болно шүү дээ.”

Орчуулагч Ольга Дмитроченковагийн бас нэгэн гайхалтай санаа нь утасныхаа хэлийг өөрчлөхөд хүртэл шинээр багагүй үгс сурах боломжтой юм. Дан ганц утас ч гэлтгүй веб хөтчийнхөө ч гэсэн хэлийг солиод үзэхэд буруудах зүйлгүй л болов уу. Мөн интернетэд байрлах хэл сурахад дэм өгөх олон гайхалтай хичээлүүдийг туршаад үзээрэй. ( Тухайлбал “Duolinguo” нь дүрэм, “Anki” нь шинэ үг цээжлэхэд тусалдаг…)

Испани хэлний орчуулагч Себастьян Беттигийнхээр бол харь хэл сурах гэдэг нь паркаар зугаалах, агаарын шоу сонирхох, ардын уран зохиол үзэхээс эхлээд зураг авах аргачлалыг хүртэл сонирхож байхдаа бүтээлч байдлаар хандах буюу өөрийн хийхийг хүсэж буй зүйлээрээ дамжуулан сурах нь хамгийн оновчтой гэдгийг онцолсон байна.

Жишээ нь Итали, Англи хэлний орчуулагч Анна Миноли нь өөрийн дуртай, сэтгэлд хоногшсон киног Англи хэл дээр хэд үзээд л тухайн хэлийг торох зүйлгүй сурсан бол Хорват хэлний орчуулагч Иван Стаменковичийн хувьд тэрбээр “The Cartoon Network” хүүхдийн сувгийг их үздэг байсан нь тавдугаар ангидаа л Англи хэлээр үзэл бодлоо чөлөөтэй илэрхийлэх хэмжээнд хүргэжээ.

Үзэл бодол, сонирхлын тал дээрээ зөрчилдөөд байдаггүй унаган хэлтэй хэн нэгэнтэй танилцаад аль болох чөлөөтэй ярихыг эрмэлзээрэй. Энэ нь танд өөрийн яриагаа бусдад хүргэхийн тулд эхлээд бүтэн утгаар нь дотроо орчуулах гэж оролдохын оронд шууд өөрт төрсөн бодлоо хүргэж сурахад дэм болно. Бүр болохгүй бол цахим ертөнцийг ашиглааарай.