Дулааны улиралд нарны туяа хурц байдаг учраас үсийг их гэмтээдэг. Тэр тусмаа хамгийн амархан гэмтдэг хэсэг бол үсний үзүүр хэсэг юм. Тиймээс зун гандаж муудсан үснийхээ үзүүрээс бага зэрэг тайруулахад гэмгүй. Ер нь үсээ хоёр сар тутамд нэг удаа тогтмол тайруулах нь үсний эрүүл залуу байдлыг хадгалж, ургалтыг сайжруулахад чухал нөлөөтэй.

Сэрүүний улиралд үсэнд байгалийн гаралтай тэжээл илүү их хэрэгцээтэй байдаг. Химийн найрлагатай бүтээгдэхүүн хуйхыг хуурайшуулан загатнуулж, үсийг ширүүн болгодог учраас аль болох байгалийн гаралтай тэжээлийн тос хэрэглээрэй. Тухайлбал спиртийн найрлагатай болон хиймэл аргаар гаргаж авсан бүтээгдэхүүнээс татгалзах хэрэгтэй. Харин түүний оронд ургамлын тос агуулсан үсний бүтээгдэхүүн хэрэглэхээс гадна шампуньдаа хэдэн дусал кокосын тос нэмж өгвөл үс илүү торгомсог зөөлөн болдог байна.

Зун ихэнх хүмүүс үсний засалтаа чөлөөтэй энгийн байлгахыг илүүд үздэг бол намар арай хээнцэр байдлыг эрхэмлэдэг. Тиймээс намрын улиралд үсний сэнс, хэлбэржүүлэгч бүтээгдэхүүн, индүү зэргийн хэрэглээ огцом ихэсдэг ажээ. Эдгээрийг тогтмол хэрэглэдэг хүмүүст эхлээд үсэндээ хамгаалах бүтээгдэхүүн түрхэхийг зөвлөе. Жишээ нь үсээ индүүдэхийн өмнө халуунаас хамгаалах спрей цацах зэргээр үсийг гэмтэхээс урьдчилан сэргийлдэг бүтээгдэхүүнийг заавал хэрэглэж байгаарай.

Ажил, хичээл ид өрнөж буй завгүй улиралд үсэндээ гель, лак түрхэх, угаах, сэнсдэх шаардлага зайлшгүй тулгардаг. Үүнээс үүдэн үс гэмтэх, амархан тослогтох зэрэг сөрөг үр дагаврууд үүсдэг. Үүнийг шийдэх нэг арга нь үс, хуйхны тослогийг тэнцвэржүүлж, гүн цэвэрлэх үйлчилгээтэй “Цэвэрлэгч шампунь” (Clarifying Shampoo) хэрэглэх явдал юм. Гэхдээ уг шампунь хүчтэй үйлчилгээтэй учраас үсний будгийг гундаах эрсдэл бий гэдгийг анхаарах нь зүйтэй.

Хүйтний улиралд арьс маш их хуурайшдагтай адил үс ч бас чийглэг зөөлөн байдлаа алдаж эхэлдэг. Тиймээс цаг уурын өөрчлөлт эрчимждэг намрын улиралд үсэнд чийгшил өгөх нэмэлт арчилгаа зайлшгүй хэрэгтэй. Үүний тулд үсээ угаасны дараа байгалийн гаралтай чийгшүүлэгч ангижруулагч юмуу тосон маск түрхэж байгаарай.

Хүйтэн сэрүүн цагт эрчүүд малгай өмсөхөөс татгалздаггүй ч эмэгтэйчүүдийн хувьд ихээхэн асуудал үүсгэдэг. Гэхдээ үсний хэлбэр алдагдахвий гэж малгайгүй явах нь үсийг гэмтээх хамгийн том шалтгаан болдог. Иймд эрүүл сайхан үстэй байхын тулд ямар нэг аргаар хамгаалах хэрэгтэй юм. Жишээ нь нимгэн ороолт, алчуураар толгойгоо бүтээх эсвэл үс хэлбэржүүлэгч бүтээгдэхүүнээ цүнхлээд малгайгаа тайлсны дараа үсээ янзлах гэх мэт аргуудыг туршаад үзэхэд илүүдэхгүй. Мөн сэрүүний улиралд малгай өмссөн ч урт үс хэлбэр нь алдагдахгүй, янзлахад хялбар учраас илүү тохиромжтой байдаг.