Сүүлийн саруудад манай улсын инфляцын түвшин нэг оронтой тоонд хадгалагдсаар энэ оны гуравдугаар сарын байдлаар инфляц улсын хэмжээнд 7 хувьтай, Улаанбаатар хотын хэмжээнд 7.2 хувьтай гараад байна. Энэ нь 2024 онд инфляцыг 6 хувьд хүргэнэ гэсэн төв банкнаас тавиад буй зорилтот түвшин рүү ойртсон үзүүлэлт болоод буй. Ийнхүү 3-р сард инфляц 7 хувьд хүрэхэд хүнсний бараа, ундаа, усны бүлгийн үнийн өсөлт 40.2 хувь нөлөөлсөн гэж үзэж байгаа аж. 

Өөрөөр хэлбэл, хэрэглээний бараа, үйлчилгээний үнэ өмнөх оноос 7 хувь өссөн гэсэн үг юм. Ингэж өсөхөд хүнсний бараа, ундаа, усны бүлгийн үнийн өсөлтөөс 40.2 хувь нь шалтгаалсан гэж Үндэсний Статистикийн Хороо үзээд байна. 

Үүнийг бүсчилж үзвэл, энэ хугацаанд хангайн бүсэд барааны бүлгийн үнэ 8.2 хувь, Улаанбаатар хотод үйлчилгээний бүлгийн үнэ 7.6 хувь, Төвийн бүсэд хүнсний бүлгийн үнэ 11.4 хувь, Улаанбаатар хотод хүнсний бус бүлгийн үнэ 6.1 хувиар тус тус өссөн нь хамгийн өндөр байгаа юм.

Хүснэгт 1. Инфляцад бараа, үйлчилгээний бүлгүүдийн үнийн өсөлтийн оролцоо, нэгжээр, жил бүрийн гуравдугаар сард

Инфляцын түвшин буюу хэрэглээний бараа, үйлчилгээний үнэ 2023 оны гуравдугаар сард 12.2 хувь гарч байсан бол 2024 оны гуравдугаар сард 7 болсноор өсөлтийн хурд өмнөх оны мөн үеэс 5.2 хувиар буурсан үзүүлэлт болоод байгаа юм.