2017 оны 2-р сарын 3-р долоо хоногт хонины ястай нэг килограмм мах дунджаар 6070 төгрөг, үхрийн ястай мах нэг килограмм нь дунджаар 7550 төгрөгийн үнэтэй байна. Үхрийн ястай махны үнэ өмнөх долоо хоногтой харьцуулахад 1.1 хувиар буюу 80 төгрөгөөр өсч, харин үхрийн цул махны үнэ тогтвортой байв. Энэ 7 хоногийн ажиглалтаар үхрийн мах "Баянзүрх”, "Хархорин” хүнсний захуудад хамгийн хямд буюу 7300 төгрөг, харин "Бөмбөгөр”, "Меркури”, "Таван-Эрдэнэ” хүнсний захуудад хамгийн өндөр үнэтэй буюу 8000 төгрөг байна. 

Хонины ястай махны үнэ өмнөх долоо хоногтой харьцуулахад 0.9 хувиар буюу 55 төгрөгөөр нэмэгдэж, харин хонины цул махны үнэ тогтвортой байлаа. Энэ долоо хоногийн ажиглалтаар хонины мах "Баянзүрх”, "Хүчит Шонхор”, "Хархорин” хүнсний захуудад хамгийн хямд буюу 5200 төгрөгөөр, харин "Меркури” хүнсний захад хамгийн өндөр үнэтэй буюу 7500 төгрөгөөр худалдаалж байна.

Сар шинийн баярын ширээний ууцны дундаж үнэ 192500 төгрөг байна. 2016 оны сар шинийн баярын өмнөх үеэс ууцны үнэ тогтвортой байлаа. Овор хэмжээ бага ууцыг "Хүчит Шонхор” зах дээр 120000-150000 төгрөг, дунд хэмжээний ууцыг 180000-200000 төгрөг, том овор хэмжээтэй ууцыг 250000-280000 төгрөгөөр тус тус худалдаж байна.  

Гурилын үнэ 

2017 оны 2-р сарын 3-р долоо хоногт нийслэлийн хүнсний томоохон зах, дэлгүүрт "Алтан тариа” савласан нэг кг гурилын үнэ дээд зэрэг нь 1200-1500 төгрөг, 1-р зэргийнх 1000-1300 төгрөг, 2-р зэргийнх 800-900 төгрөг байна. Худалдан авагч олон байдаг "Хүчит шонхор”, "Таван эрдэнэ”, "Бөмбөгөр”, "Баянзүрх”, "Хархорин” хүнсний захуудад задгайгаар буюу шуудайгаар худалдаж буй нэг кг дээд зэргийн "Алтан тариа” гурилын үнэ 1150-аас 1300 төгрөгийн үнэ ханштай байна. Харин "Барс” хүнсний захад дээд зэргийн "Алтан тариа” гурил 1100 төгрөг, 1-р зэргийн гурил 950 төгрөгөөр тус тус зарагдаж байна. "Атар” талх хүнсний зах, дэлгүүрт 1100-1210 төгрөгийн үнэтэй байна. "Бөмбөгөр”, "Барс”, "Оргил”, "Хархорин” хүнсний захуудад "Атар” талхыг хамгийн хямд буюу 1100 төгрөгөөр, харин "Сансар” супермаркетад хамгийн өндөр үнээр буюу 1210 төгрөгөөр худалдаалж байна.  

Цагаан сарын баярын ширээний тавгийн гол идээ болох хэвийн боовны үнэ нэг ширхэг нь дунджаар 2062 төгрөг байна. Хамгийн хямд үнэтэй хэвийн боов нь "Өгөөж” үйлдвэрийнх, хамгийн өндөр үнэтэй нь "Бамбууш” үйлдвэрийнх байна. Хэвийн боовны үнийн ялгаа нь харагдах өнгө зүс, амт, чанараас шалтгаалж байв. 2016 оны цагаан сарын баярын өмнөх үеэс хэвийн боовны үнэ 5.5 хувиар буюу 107 төгрөгөөр өссөн байлаа.

Төмс, хүнсний ногоо 

2017 оны 2-р сарын 3-р долоо хоногт өмнөх долоо хоногтой харьцуулахад монгол лууван 7.6 хувиар буюу 80 төгрөгөөр буурсан байна.