2025 оны нэгдүгээр сараас ам.долларын ханш тогтмол өссөөр өнөөдрийн байдлаар Монголбанкны "нэрлэсэн ханш" нэг ам.доллар 3455 төгрөгтэй тэнцэж байгаа бол валют арилжааны  төвүүд дээр хэдийн 3500 төгрөгт хүрээд байна.

Ингэснээр зах зээл дээрх албан ба хар захын ханшийн зөрүү 30-40 төгрөгт хүрэв.

Харин юанийн ханш өнгөрсөн долоо хоногт 471-474 төгрөг байсан бол өнөөдөр 476-479 төгрөгт хүрч өслөө. Валютын ханшны сулрал нь импортын барааны үнийг улам нэмэгдүүлж, инфляцид шууд нөлөөлнө гэдгийг салбарынхан хэлж буй.

Харин энэ талаар Монголбанкнаас өгсөн мэдээллээр сүүлийн үед автомашины импорт болон иргэд гадагшаа аялах урсгал нэмэгдсэн нь валютын нөөц буурахад нөлөөлж байна гэх тайлбарыг өгсөн.

Өөрөөр хэлбэл, Монголчууд дулаан орон буюу Тайланд, Вьетнамыг зорих болсон нь  ийнхүү улсын валютын нөөц буурахад нөлөөлсөн болж таарав. Гэтэл монголчууд өвлийн улиралд энэ их түгжрэл, стресс, утаанаас зугтаж, нэг долоо хоног ч гэсэн үр хүүхдүүдээ цэвэр агаарт байлгахыг хүсээд мөнгөгүй нь зээл аваад ч хамаагүй дулаан орныг зорих болсон. Угтаа бол тэд мөнгө ихтэйдээ биш  уушгиа хэдхэн өдөр ч гэсэн цэвэр байлгах гэж гадагшаа зорих болсон нь улсынхаа валютын нөөцийг багасгасан хэрэгт оров.

Монголбанкны барьж буй бодлогоор улсын валютын нөөцөө багасгахгүйн тул Монголчууд шинээр машин унаж болохгүй, Тайланд, Вьетнамыг зорьж болохгүй болчихоод байна...

Ямар эмзэг, ямар ч хэврэг Монголбанкны бодлого бэ Б.Лхагвасүрэн ерөнхийлөгч өө...

Монголбанкны ерөнхийлөгч Б.Лхагвасүрэнг 2019 оны арваннэгдүгээр сарын 22-нд томилж байв. Тухайн үед долларын ханш Монголбанкны зарласнаар 2706 төгрөг, гадаад валютын албан нөөц 4 тэрбум доллар байлаа.  Харин одоо  Монголбанкны зарласнаар ам.долларын ханш 3455 төгрөгтэй тэнцэж төгрөгийн ханш унаад байна. 

Өөрөөр хэлбэл, Б.Лхагвасүрэн Монголбанкны ерөнхийлөгчөөр томилогдсоноос хойш төгрөгийн ханш суларч, гадаад валютын албан нөөц буурав.