Гадаад валютын албан нөөц энэ оны долоодугаар сарын сүүлийн байдлаар 3.8 тэрбум ам.долларт хүрсэн байна. Энэ нь өмнөх сараас 0.25, оны эхнээс 12.58, жилийн өмнөхөөс 32.96 хувиар өссөн үзүүлэлт юм.

Өмнөх жилийн мөн үетэй харьцуулахад гадаад валютын нөөц нэг тэрбум ам.доллароор нэмэгдсэн байна.

Тодруулбал, өнгөрсөн жил буюу 2022 оны долоодугаар сард валютын нөөц 2.8 тэрбум ам.доллар байв.

Ташрамд дурдахад, Монголбанк дахь гадаад валютын улсын нөөц нь дараах төрлийн активаас бүрддэг юм.

Үүнд,

• Гадаад орны банк, санхүүгийн байгууллагад хадгалж байгаа мөнгөжсөн алт
• Бэлэн ба бэлэн бус хэлбэрээр байгаа чөлөөтэй хөрвөдөг гадаад валют
• Чөлөөтэй хөрвөдөг гадаад валютаар чөлөөтэй төлөгдөх вексель
• Гадаад орны Засгийн газар, төв банк, олон улсын санхүүгийн байгууллагаас гаргасан буюу баталгаажуулсан чөлөөтэй хөрвөдөг гадаад валютаар нэрлэсэн, түүгээр төлөгдөх бүх төрлийн үнэт цаас
• Олон улсын хэмжээнд гадаад валютын нөөцөд тооцогдох бусад активаас бүрдэнэ.