Хөгжингүй эдийн засагтай орнууд дахь хүүгийн өсөлтөөс хамаарч мөнгөний бодлогыг чангаруулахад бэлэн байх хэрэгтэй хэмээн Дэлхийн банкнаас мэдэгдлээ.

Дэлхийн банкны энэ удаагийн тайланд хөгжиж буй Зүүн Ази, Номхон далайн бүс нутгууд эрсдэл даах чадвараа хадгалахын тулд богино хугацааны өсөлтийг хангахад чиглэсэн арга хэмжээний оронд санхүү, төсвийн эмзэг байдлыг шийдвэрлэхэд чиглэсэн арга хэмжээ авахыг уриалжээ. Тодруулбал хувийн хэвшлийн өр, зээл хурдацтай нэмэгдэж буй улс орнуудад хяналт шалгалт, зохицуулалтыг бэхжүүлэх, төсвийн орлого бүрдүүлэлтийг сайжруулахын тулд татварын бодлого, татварын удирдлагын шинэчлэл хийх нь зүйтэй гэсэн байна.

Улмаар дэлхийн эдийн засгийн идэвхжил нэмэгдэхээр байгаа нь Зүүн Ази, Номхон далайн бүс нутгийн эдийн засагт эергээр нөлөөлөхөөр байгааг онцолжээ. Мөн 2017 онд бүс нутгийн эдийн засаг 6.4 хувь өсөхөөр байгаа нь урт хугацааны хүндрэлийг даван туулах орон зайг нэмэгдүүлнэ хэмээн дүгнэлээ.

Харин Монгол Улсын эдийн засаг 2017-2018 онд бага зэрэг сэргэх төлөв ажиглагдаж байгаа аж. Юуны түрүүнд хөдөлмөр эрхлэлтийг дэмжих, мэдлэгт суурилсан эдийн засгийг дэмжих замаар өрхийн орлого, төсвийн орлогыг нэмэгдүүлэхэд анхаарах хэрэгтэйг санууллаа. Мөн эдийн засгийн төлөв эерэг байгаа ч өсөлтийн дархлаа нь бодлого боловсруулагчдаас хамаарах бөгөөд дотоодын эмзэг байдлаа хэрхэн бууруулахаас шалтгаална хэмээн тодотгов.

     Дэлхийн Банкны Зүүн Ази, Номхон далайн бүс хариуцсан Дэд Ерөнхийлөгч Виктория Кваква: "Дэлхийн эдийн засаг сэргэж, худалдаа идэвхжиж байгаа нь Зүүн Ази, Номхон далайн бүсийн хувьд сайн мэдээ болж байгаа бөгөөд энэ нь ялангуяа амьжиргааны түвшнийг дээшлүүлэх чиглэлээр цаашид үргэлжлүүлэн амжилт гаргахад чухал ач холбогдолтой. Бүс нутгийн хэмжээнд тогтвортой, хүртээмжтэй өсөлтийг хангах суурь үндсийг бий болгохын тулд нэн тэргүүнд богино хугацаанд өсөлтийг хангах, дунд хугацаанд эмзэг байдлыг бууруулах зэрэг зорилтыг оновчтой хослуулах асуудал нь улс орнуудын хувьд гол сорилт байх болно" гэв.

Зүүн Ази, Номхон далайн бүсийн 2017 оны 10 дугаар сарын эдийн засгийн тоймд 2017 оны эдийн засгийн өсөлт өмнө төсөөлж байсантай харьцуулахад өндөр гарсан нь Хятадын эдийн засгийн өсөлт таамагласнаас өндөр буюу 6.7 хувьтай байгаа нь голлон шалтгаалжээ. Энэ нь тус улсын 2016 оны эдийн засгийн өсөлттэй ижил түвшинд байгаа аж. Мөн Зүүн Өмнөд Азийн томоохон орнууд болон бүсийн бусад орнуудын эдийн засгийн өсөлт харьцангуй хурдацтай буюу 2016 онд 4.9 хувь байснаас өсч, 2017 онд 5.1 хувь, 2018 онд 5.2 хувь байх төлөвтэй байгааг дурдав.

Гэхдээ энэхүү эерэг төлөв байдалд гадаад болон дотоод хэд, хэдэн эрсдлүүд нөлөөлж болзошгүй гэдгийг тодотголоо. Зарим хөгжингүй орнуудын эдийн засгийн бодлого тодорхойгүй хэвээр байгаа бол бүс нутаг дахь геополитикийн хурцадмал байдал улам бүр нэмэгдсээр байгаа. АНУ болон Евро бүс мөнгөний бодлогоо төсөөлж байснаас илүү хурдан чангаруулах магадлалтайг сануулав.

  Дэлхийн Банкны Зүүн Ази, Номхон далайн бүсийн ерөнхий эдийн засагч Судхир Шетти, "Дэлхийн эдийн засгийн өсөлтийн төлөв байдал сайжирсан нь урт хугацааны өсөлтийг хангах шинэчлэлийн арга хэмжээг хэрэгжүүлэхийн зэрэгцээ эмзэг байдлыг бууруулах боломжийг улс орнуудад олгож байна. Санхүүгийн салбарын тогтвортой байдлын эрсдлийг бууруулж, өрсөлдөх чадварыг бэхжүүлэх, ялангуяа бүс нутгийн интеграцчиллыг дэмжих нь тэргүүлэх чиглэл хэвээр байна" хэмээн онцлов.