“Оюутолгой”-н хоёрдугаар шатны санхүүжилтийн гэрээг байгуулснаар төсвийн орлого нэмэгдэж, бондын эргэн төлөлтөд дэмжлэг болно гэж эдийн засагчид үзэж байна. Эхний ээлжинд ирэх оны гуравдугаар сард Хөгжлийн банкны 580 сая ам.долларын бондын эргэн төлөлтийг хийнэ. Үүнд улсын төсвөөс 520 орчим тэрбум төгрөг төлөх бол үлдсэн хэсгийг нь санхүүжилт олгосон төслүүдээс буюу ДЦС-3, ДЦС-4-ийн өргөтгөл, “Эрдэнэс Таван толгой” компаниас гаргана гэж Хөгжлийн банкны гүйцэтгэх захирал Н.Мөнхбат өмнө нь мэдээлж байсан юм.

Харин 2018 оны нэгдүгээр сард “Чингис” бондын 1.5 тэрбум ам.доллараас 500 сая ам.долларын эргэн төлөлт хийнэ. Үүнийг улсын төсөв бус зөвхөн хөрөнгө оруулсан төслүүдээс төлөх аж.

Тэгвэл хувийн хэвшлийн гадаад бондуудын хувьд “Mongolian Mining Corporation”-ийн 600 сая ам.долларын бондын төлбөр 2017 оноос хийгдэх хүлээлттэй байна. Мөн Худалдаа хөгжлийн банкны 2017 онд төлөх нөхцөлтэй 700 сая юанийн бонд, 2020 онд төлөх 500 сая ам.долларын бондын төлбөр хүлээгдэж байна. Тус банк 500 сая ам.долларын бондын санхүүжилт олон улсын зах зээлээс амжилттай татсан юм. Мөн өнгөрсөн оны гуравдугаар улиралд багтаан 2012 онд олон улсын зах зээлд гаргаж байсан 300 сая ам.долларын бондыг эргүүлэн төлсөн.

Үүнээс гадна 2023 онд эргэн төлөх буюу 10 жилийн хугацаатай 30 тэрбум иенийн “Самурай” бонд, өнгөрсөн оны хоёрдугаар улиралд гаргасан 161 сая ам.доллартай тэнцэх юанийн бонд буюу дим сам бондын төлбөрийг Монгол Улсын Засгийн газраас 2018 онд эргэн төлөх нөхцөлтэй байгаа юм.