Энэ оны эхний найман сарын байдлаар гадаад худалдааны тэнцэл 700 гаруй сая ам.долларын ашигтай гараад байна.

Өнгөрсөн оны мөн үед гадаад худалдааны тэнцэл 23 сая ам.долларын алдагдалтай гарсан талаар Үндэсний Статистикийн Хорооноос мэдээллээ. Гадаад худалдаанаас эрдэс бүтээгдэхүүний экспортыг аваад үзвэл 2.56 тэрбум ам.доллар болж өнгөрсөн оны мөн үеэс 13.3 хувиар буурсан байна.

Алт, зэсийн баяжмал зэрэг голлох бүтээгдэхүүнүүдийн экспортын биет хэмжээ нэмэгдсэн ч ханшийн уналттай холбоотойгоор үнийн дүн нь буураад байгаа юм. Зэсийн баяжмалын экспортын хувьд биет хэмжээ нь 10.2 хувиар нэмэгдэж, 930 мянган тонн болжээ. Харин алтны экспорт 35.8 хувиар өсч, 7 тоннд хүрчээ.

Төмрийн хүдэр, нүүрсний хувьд экспортын үнийн дүн төдийгүй биет хэмжээний уналтаараа тэргүүлж байна. Нүүрсний экспортын биет хэмжээ 21.5 хувиар буурч, 9.6 сая тонн болсон бол төмрийн хүдэр 18.8 хувиар хумигдаж, 3.1 сая тонн болжээ.