Монгол Улсын Хөгжлийн банк Дэлхийн банктай хамтран санхүүжилтийн платформ бий болгохоор ажиллаж байна. Энэ хүрээнд хоёр талын төлөөлөл энэ сарын 03-ны өдөр уулзаж, хамтын ажиллагаа, цаашид хэрэгжүүлэх арга хэмжээний талаар санал солилцлоо.

Дэлхийн банкнаас Хөгжлийн банкны тухай хуулийн шинэчилсэн найруулгын төсөлд зөвлөмж өгч, банкны засаглалыг сайжруулах, үйл ажиллагааны шинэчлэлийг дэмжих чиглэлээр хамтран ажиллаж байна.

Энэхүү хамтын ажиллагааны хүрээнд үндэсний эдийн засгийн тогтвортой өсөлтийг хангах төсөл хөтөлбөрүүдийн санхүүжилтийн эх үүсвэрийг нэмэгдүүлэх, санхүүжилтийн хүртээмжийг өргөжүүлэх зорилт тавьж байгаа юм.

Талууд дээрх зорилтуудыг хэрэгжүүлэхдээ Эдийн засаг, хөгжлийн яам болон Сангийн яамтай нягт хамтран ажиллана.