Өчигдөр буюу 2025 оны дөрөвдүгээр сарын 24-ний өдөр ЗГХЭГ-ын дарга Н.Учрал  E-Mongolia платформ 2 сая хэрэглэгчтэй болж, 1,264 үйлчилгээг хүргэж байна гэж мэдэгдсэн. 

Гэтэл арилжааны банкууд өнөөдрийг хүртэл И-Монголиа платформыг хүлээн зөвшөөрөхгүй хэвээр байна. 

Тодруулбал, өнөөдөр Хаан банкны салбарууд үйлчлүүлэгчээсээ иргэний үнэмлэхний эх хувийг шаардаж, И-Монголиагийн лавлагааг хүчингүй хэмээн гүйлгээ хийгээгүй байна. 

Хаан банкнаас хэлж буйгаар И-Монголиагийн иргэний үнэмлэхний лавлагаа нь гүйлгээ хийх эрхийг нээхгүй бөгөөд иргэн, үйлчлүүлэгч заавал эх хувиар иргэний үнэмлэхээ үзүүлж үйлчлүүлэх, банк тухайн үнэмлэхийг хуулбарлаж авах зэргээр хуучны системээр явна хэмээжээ. 

Тэгвэл И-Монголиагийн лавлагаа чухам юунд хэрэг болох вэ. Төрийн байгууллагад нэвтэрч ороход, тухайн иргэнийг мөн эсэхийг баталсан тохиолдолд үзүүлэх төдийг үүргийг л өнөөдөр гүйцэтгэж байгаа нь харамсалтай. Иргэний анхан шатны цахим үйлчилгээ болох иргэний үнэмлэхийг И-Монголиа төлөөлөхгүй байгаа нь банк, санхүүгийн байгууллагууд И-Монголиа платформыг албан ёсны хэмээн хүлээн зөвшөөрөөгүй гэсэн үг юм.