УИХ-ын Эдийн засгийн байнгын хорооны өчигдрийн хуралдаанаар Монголбанкны Хяналтын зөвлөлийн үйл ажиллагааны талаарх Монголбанкны ерөнхийлөгч, Монголбанкны Хяналтын зөвлөлийн мэдээллийг сонсох асуудлыг хэлэлцсэн.

Энэ үеэр УИХ-ын гишүүд Монголбанкны алдагдал их байгааг анхааруулаад ойрын хугацаанд УИХ-д танилцуулах ёстой, Монголбанк үндсэн үүргээ биелүүлж чадсангүй гэдэг байр суурийг бүгд хэллээ.

Тухайлбал, "Монголбанкны өөрийнх нь алдагдал замбараагүй юм байгаа. Энэ дээрээ хэзээ дүгнэлт гаргаад Эдийн засгийн байнгын хороонд хаалттай ч юм уу мэдээлэл өгөх вэ. Энэ алдагдлыг хэрхэн бууруулах вэ. Юунаас олоод алдагдал үүсчихсэн юм. Энэ замбараагүй их мөнгө байгаа" гэдгээ УИХ-ын гишүүн Р.Батболд мэдэгдсэн.

Харин УИХ-ын гишүүн Г.Тэмүүлэн "Монголбанкны Ерөнхийлөгч Б.Лхагвасүрэнгийн ажлыг Сангийн сайд хийгээд байна. Монголбанк Сангийн яамны кассын машин шиг ажиллаж байна. Ийм байж болохгүй. Монголбанкны бие даасан, хараарт бус юу болсон бэ. Төсөв мөнгөний бодлого тусдаа байх зарчмын асуудал шүү" гэдгийг хатуухан сануулав.

Тодруулбал, 2023 оны байдлаар Монголбанкны алдагдал хоёр тэрбум ам.доллар буюу 7,4 их наяд давсныг ОУВС анхааруулжээ.

2023 оны дүнгээр нийт актив 19 их наядад, пассив 26 их наядад хүрсэн бөгөөд үүний зөрөө нь Монголбанкны алдагдал 7.4 их наяд төгрөг болоод байгаа. Ойрын хугацаанд Төв банкнаас актив, пассив хоёрын зөрүү нэмэгдээд байгаатай холбоотойгоор УИХ-д хүсэлт гаргана гэдгийг өөрсдөө ч хүлээн зөвшөөрөөд буй. 

Товчхондоо, 2019 оноос хойш 5 жил ажиллахадаа Монголбанкны алдагдлыг 7.4 их наяд хүргэж, татвар төлөгчдийг хохироож буй Б.Лхагвасүрэнд ХАРИУЦЛАГА ТООЦОХ хэрэгтэй биш гэж үү.

Ерөнхий сайдаа, өөрөө ажлаа хийж чадахаа байсан МОНГОЛБАНКНЫ ерөнхийлөгч Б.ЛХАГВАСҮРЭНД хариуцлага тооцох цаг нь болсон юм биш үү.