Сүхбаатар дүүргийн Эрүүгийн хэргийн анхан шатны шүүхэд хянагдаж байгаа “Хөгжлийн банк”-ны гэх 80 хүн, 4 хуулийн этгээдэд холбогдох эрүүгийн хэргийн гэм буруугийн шүүх хуралдаан эхэллээ. 

Хэргийн урьдчилсан хэлэлцүүлгийг өнгөрсөн сард зохион байгуулсан. Ингэхдээ яллагдагч 80 хүн, дөрвөн хуулийн этгээд, прокурор зургаа, өмгөөлөгч 106, гэрч 28, хохирогчийн төлөөлөгч хоёр, шинжээч 10, хууль ёсны төлөөлөгчид 15, нийт 257 хэргийн оролцогч багтахуйц танхим болох Нийслэлийн Улаанбаатар чуулгын байранд шүүх ажиллагаа явуулахаар болсон юм.

Уоьдчилсан хэлэлцүүлгийн үеэр өмгөөлөгч нарын зүгээс хэргийг түдгэлзүүлэх, Үндсэн хуулийн цэцэд байгаа маргаантай холбогдуулан хойшлуулах, прокурорын гаргасан алдаа буюу тоо баримт, үг үсэгт засвар оруулах, нэр бүхий яллагдагчийн өмгөөлөгч хэргийн материалтай танилцах, хэрэг бүртгэл мөрдөн байцаалтын явцад эрх зөрчигдсөн, хэргийг хэрэгсэхгүй болгох, хэргийг харьяа шүүхэд шилжүүлэх гэх хүсэлтүүд ирүүлснийг шүүх бүрэлдэхүүн хэлэлцэхгүйгээр шийдвэрлэсэн. Улмаар Хөгжлийн банкийг хохироосон эрүүгийн хэргийн гэм буруугийн шүүх хуралдааныг 3-р сарын 2-ны өдрийн 09:00 цагт товлосон. Шүүх хуралдааны зарим хэсэг хаалттай явагдана.