Монголбанкнаас сар бүр зохион байгуулдаг хэвлэлийн хурлаа хийлээ. Энэ үеэр мөнгөний нийлүүлэлтийн талаарх статистик мэдээлэл болон мөнгөний бодлогын чиглэлээр хийж буй ажлуудаа танилцууллаа. 

"2019 он гарсаар эхний дөрвөн сарын байдлаар Монголбанк 900 орчим зээлдэгчид 64 тэрбум төгрөгийн ипотекийн зээлийг банкуудаар дамжуулан олгосон байна. Энэ оныг дуустал сар бүр 46 тэрбум төгрөгийг ипотекийн зээлийн зориулалтаар арилжааны банкуудад олгоно” гэдгээ Монголбанкны Хэвлэлийн төлөөлөгч Д.Оргил хэлээ.

Ипотекийн зээлийн санхүүжилтийг ганцхан Монголбанкнаас бус арилжааны банктай хамтран олгох ажлыг хийж байна. Сар бүр 36 тэрбум төгрөгийн зээлийн санхүүжилтийг олгоод эхлэхээр хүлээгдэж хуримтлагдсан зээлүүд олгогдоод эхэлнэ гэдээ мөн мэдэгдлээ.

"Мөнгөний нийлүүлэлт 19.7 их наяд төгрөг болж өмнөх оны мөн үеэс 22.6 хувиар өслөө. Валютын хадгаламж буурч, төгрөгийн хадгаламж өссөн. Мөнгөний нийлүүлэлтийн 56 хувийг төгрөгийн хадгаламж эзэлж байна. Монгол Улсын иргэдийн хадгаламж 14 их наяд төгрөгт хүрсэн бол харин нийт хадгаламжийн 20.6 хувь нь гадаад валютын хадгаламж байна." гэдгээ хурлын үеэр Монголбанкны Статистикийн хэлтсийн захирал Б.Батсүрэн хэллээ.