Төв банк арилжааны банкуудын ипотекийн зээлийн санхүүжилтэд шалгалт оруулсантай холбогдуулан зээл олголт тодорхойгүй хугацаагаар зогссон гэх мэдээллийг Монголбанкнаас гаргасан байна. Энэ талаар Монголбанкны хэвлэлийн төлөөлөгч Д.Ариунаа “Монголбанк ипотекийн зээлийн санхүүжилтийг түр зогсоосон. Учир нь Төв банкнаас өнгөрсөн наймдугаар сард арилжааны банкуудад шалгалт хийсэн. Тодруулбал, арилжааны банкууд ипотекийн зээлийн санхүүжилтийг цаг хугацаанд нь гаргүй өөр дээрээ хадгалсан, зориулалтын бусаар  зарцуулж байгаа зөрчил ажиглагдсан.  Үүнтэй холбогдуулан нэгдсэн журмаар шалгалт хийсэн.  Эдгээр зөрчлийг хэрхэн шийдвэрлэх вэ гэдгийг Монголбанк болон арилжааны банкуудын удирдлагын төвшинд хэлэлцэж байна. Ингээд нэгдсэн шийдэл гаргасны дараа ипотекийн зээлийн санхүүжилт үргэлжлэн олгогдоно” гэлээ.

Харин ипотекийн таван хувийн зээлийн санхүүжилтийн талаар "Төв банкны зүгээс ипотекийн таван хувийн зээлд санхүүжилт олгохгүй гэсэн байр суурьтай байна. Эдийн засгийн нөхцөл байдал хүндэрч, төсвийн алдагдал нэмэгдэж, орлого тасалдаж буйтай холбогдуулан Төв банк зах зээлд их хэмжээний мөнгө нийлүүлэхгүй байх зайлшгүй шаардлага үүссэн. Үүнтэй холбоотойгоор бодлогын хүүг 4.5 нэгж хувиар нэмэгдүүлж, 15 хувьд хүргэсэн билээ. Ингэж мөнгөний хатуу бодлого баримталж эхэлсэн учраас цаашид ипотекийн таван хувийн зээлээр дамжуулан мөнгөний нийлүүлэлтийг дэмжихгүй гэж Монголбанк үзэж байгаа юм.

Гэхдээ ипотекийн таван хувийн зээлийн хөтөлбөр нь Засгийн газраас баталсан журмын дагуу хэрэгждэг. Тийм учраас Засгийн газар тодорхой төвшинд эх үүсвэрээ шийдэж чадвал ипотекийн таван хувийн зээлийн хөтөлбөрийг үргэлжлүүлэх боломжтой. Өөрөөр хэлбэл, ипотекийн таван хувийн зээлийн хөтөлбөрийг үргэлжлүүлэх эсэх нь Засгийн газрын төвшинд шийдэгдэх юм" гэсэн хариулт өглөө.