ХХААХҮЯ-наас мэдээлснээр энэ онд

• 389 мянган га-д үр тариа,
• 17 мянган га-д төмс,
• 9 мянган га-д хүнсний ногоо,
• 66 мянган га-д малын тэжээл,
• 40 мянган га-д тосны ургамал,
• 7 мянган га-д жимс, жимсгэнэ, нийт 530.3 мянган га-д тариалалт хийнэ.

320 мянган га-д уринш боловсруулж, бэлтгэх зорилт тавьж, хаврын тариалалтын бэлтгэл ажилдаа оржээ. ХХААХҮЯ “Хүнсний ногоо” үндэсний хөтөлбөрийн хүрээнд улсын төсвийн 2.4 тэрбум төгрөгийн хөрөнгөөр төмс, хүнсний ногооны үрийн нөөц бүрдүүлж, иргэдэд нэн хөнгөлөлттэй нөхцөлөөр олгох, “Өрхийн тариалан” хөдөлгөөн өрнүүлж, тариалах талбай, хураан авах ургацын хэмжээг нэмэн, хангамжийг тогтворжуулах зорилгоор 10 нэр төрлийн 147 тонн ил талбайн болон хүлэмжийн ногооны үр, 50 тонн төмсний супер элит үрийг тариалалтаас өмнө нийлүүлэх юм.

Энэ дэмжлэгт хот, хөдөөгийн 10 мянган өрхийг хамруулахаар төлөвлөсөн байна.

10 ИХ НАЯДЫН ЦОГЦ ТӨЛӨВЛӨГӨӨНИЙ ХҮРЭЭНД ХАА-ШЩГ ХЭРХЭН ДЭМЖИХ ВЭ?

Монгол Улсын Хөгжлийн банкны эх үүсвэрээс 100 тэрбум төгрөгийн хөнгөлөлттэй зээл олгох асуудлыг ХХААХҮЯ шийдвэрлүүлжээ.

Мөн Польшийн Засгийн газрын 10 сая еврогийн санхүүжилтээр “Хүнсний ногооны үйлдвэрлэлд нэмүү өртгийн сүлжээг хөгжүүлэх” төслийг эхлүүлсэн байна. Энэ төслөөр 8.5 мянган тоннын багтаамжтай төмс, хүнсний ногооны агуулах байгуулах, 50-80 морины хүчтэй трактор 100 ширхэг, ногооны үрлэгч, хураагч комбайн, копатель, хөрс боловсруулах техник, ургамал хамгааллын бодис цацах тоног төхөөрөмж зэрэг нийтдээ 600 гаруй төрлийн техник, тоног төхөөрөмжийг нийлүүлэх юм байна. Мөн ОХУ-аас үр тарианы зориулалттай өндөр хүчин чадлын техник нийлүүлэх,  Беларусиас малын тэжээл бэлтгэх, төмс, хүнсний ногооны зориулалттай техник, тоног төхөөрөмж авахаар ажиллаж байгаа аж. Салбарын яамнаас стандартын шаардлагад нийцэх агуулахын тоог нэмэх, техник сайжруулахад чиглэн ажиллаж эхэлжээ.

Малын тэжээл тариалалтыг хэрхэн дэмжих талаарх салбарын сайд “1.0 сая га-д тариалалт эрхлэх боломжтойгоос 880 мянган га-г эдийн засгийн эргэлтэд оруулж байна. Одоогийн байдлаар 62 мянган га-д тэжээлийн таримал тарьж байна. Цаашид 100 орчим мянган га-гаар нэмнэ. Төв, хангай болон баруун, зүүн бүсэд тэжээлийн 4 үйлдвэр байгуулахаар хэлэлцээний түвшинд явж байна. Бид хүнсээ дотоодоос бүрэн хангах, импорт орлох, экспортын баримжаатай бүтээгдэхүүн үйлдвэрлэлд анхаарч ажилладаг. Ажлын байр нэмэх, тариалалтыг дэмжихэд Зээлийн батлан даалтын сангаас дэмжлэг үзүүлэх асуудлыг шийдэж байгаа” гэлээ.