461-р ангид амиа егүүтгэсэн хэргийн талаар ШШГЕГ-аас тайлбар өглөө
Амралтын өдрүүдэд ШШГЕГ-ын харъяа урьдчилсан хорих 461-р ангид саатуулагдаж байсан шүүгч өөрийн өмсөж байсан дотуур хувцсаараа /хөхний даруулга/ өөрийгөө боож амиа хорлосон гэх мэдээлэл олны анхааралд хүрээд байна.
Энэ сарын 22-ны өдөр АТГ-аас авлигалын хэргээр прокурорын зөвшөөрөл бүхий баривчилгаа явуулжээ. Улмаар талийгаачийг энэ сарын 23-ны өдөр 461-р хорих ангид 48 цагийн хугацаанд саатуулсан аж. Талийгаач ШЕЗ-ийн олон нийттэй харилцах албаны даргын үүрэгт ажлыг гүйцэтгэж байгаад тэтгэвэртэй гарсан гавъяат хуульч, шүүгч Л.Бямбаа байсан талаар хэвлэл мэдээллээр цацагдаж эхлээд байна. Тэрээр сүүлийн жилүүдэд “Консент” ХХН-ийг байгуулан хуульчаар ажиллаж байжээ.
Талийгаач тэтгэвэртээ гарсаны дараагаас өмгөөлөгч хийж байсан гэх ба АТГ-аас өнгөрсөн долоо хоногт түүний хувийн ажлын өрөөнд гэнэтийн шалгалт хийсэн байгаа юм. Ийнхүү түүний өрөөнөөс Салхитын мөнгөний ордтой холбоотой бичиг баримт илэрч цагдан хорьсон байна. Мөн талийгаачтай хамт Салхитын мөнгөний ордын хууль ёсны эзэмшигч Ш.Мөнгөншагай болон түүний нэг хамаарал бүхий хүнтэй хамт хорьсон ажээ.
Эх сурвалжийн хэлж буйгаар тус хорих ангид саатуулагдсан хоригдлууд оройн 22 цагт унтсан бөгөөд талийгаач шөнийн 00:10 цагт орноос өөрийгөө боомилж нас барсан байдалтай олдсон гэв.
Талийгаачийг амиа алдсан өдрийн маргааш өглөө нь суллагдах гэж байсан хэмээн албаныхан мэдээлж байгаа юм. Харин албан бус эх сурвалжийн мэдээллээр талийгаачийг өрөөнд гадны нөлөөтэй боосон байж болзошгүй байгаа гэдгийг дуулгаж байна.
Түүнчлэн өнгөрсөн долоо АТГ-аас үндэслэлгүйгээр хөрөнгөжсөн байж болзошгүй нэр бүхий зургаан шүүгчийн асуудлыг хянан шалгаж байсан. Дээрх шалгагдаж буй зургаан шүүгчийн бүрэн эрхийг түдгэлзүүлэх саналыг прокурорын байгууллагад хүргүүлээд байсан билээ.
Уг асуудлаар шалгагдаж байсан зургаан шүүгч дотор талийгаач Л.Бямбаагийн төрсөн хүү болох Нийслэлийн захиргааны хэргийн анхан шатны шүүхийн шүүгч С.Төмөрбат багтсан байсан юм.
Энэ талаар ШШГЕГ-аас тодрууллаа.
-Олон нийтийн анхааралд байгаа асуудлын талаар мэдээлэл өгөхгүй юу?
-Сэжигтнийг шүүхийн зөшөөрөлгүй баривчлах тухай” тогтоолоор иргэн Л.Б-г Эрүүгийн хуулийн тусгай ангийн 22.4 дүгээр зүйлийн 4 дэх хэсэг, 22.5 дугаар зүйлийн 1 дэх хэсэгт заасан гэмт хэрэгт сэжиглэн, эрх бүхий байгууллагаас 48 цагийн хугацаатай баривчилж, холбогдох хууль, журмын хүрээнд 2019 оны хоёрдугаар сарын 22-ны өдрөөс Цагдан хорих 461 дүгээр ангид саатуулан шалгаж байсан.
2019 оны хоёрдугаар сарын 23-ны өдрийн 21:40 цагийн орчим иргэн Л.Б нь ганцаараа байрлах хорих өрөөндөө өөрийн хувцасаар хоолойгоо боосон байдалтай амь насаа алдсан байсан. Одоогоор дээрх асуудалд Цагдаагийн байгууллагаас Эрүүгийн хэрэг үүсгэн шалгаж байгаа тул дэлгэрэнгүй мэдээлэл өгөх боломжгүй байна. Мөн Шүүхийн шийдвэр гүйцэтгэх ерөнхий газраас албаны шалгалт явуулж байгаа бөгөөд шалгалтын дүнг үндэслэн буруутай албан хаагчид холбогдох хууль, журмын дагуу хариуцлага тооцож, эргэн мэдээлэх болно гэсэн мэдээлэл өглөө.
Л.Анир