Албан үүргээ гүйцэтгэж яваад хоёр гэмт этгээдийн халдлагад өртөж, биедээ хүнд гэмтэл авсан цагдаагийн алба хаагчийг өнөөдөр 11:00 цагийн үед яаралтай хагалгаанд оруулсан байна. Эмнэлгийн байгууллагаас шаардлагатай бүхий л арга хэмжээг авсан боловч харамсалтай нь биеийн байдал маш хүнд байсан учир тэрээр нас баржээ. 

Оргон зайлсан гэмт этгээдүүд цагдаагийн алба хаагчийг 5 км газар машинаараа чирснээс болж тархи нь бяцарч, биедээ хүнд гэмтэл авсан байжээ. Ар гэрийнхэн нь гадагшаа явж шаардлагатай гэсэн бүх эмчилгээг хийлгэх хүсэлтэй байсан ч эмч нар хөдөлгөөнгүй байлгах шаардлагатай, тээвэрлэлт хийх боломжгүй гэсэн хариу өгсөн тухай мэдээлж байсан юм.

Талийгаач нь 41 настай 4 хүүхдийн хамт амьдардаг. Цагдаагийн байгууллагад 22 жил ажилласан. Хамгийн бага хүүхэд нь 1 ойтой байжээ. Тэрбээр тэтгэвэртээ гарахаар бүх материалаа бүрдүүлээд өгсөн байсан ч ийнхүү халдлагад өртөж амиа алдлаа.