Төв талбайд наадам зохион зохион байгуулахыг эсэргүүцсэн иргэдийн жагсаал, Үндэсний их баяр наадмаар хурдан морины уралдааныг хийхийг шаардаж буй морьтой иргэдийн жагсаал болж буй. Үүн дээр цалингаа хоёр дахин нэмэхийг шаардаж буй эмч, эмнэлгийн ажилтнууд Төв талбайд суулт зарлав.

Монголын эрүүл мэндийн ажилчдын үйлдвэрчний холбооны дарга Х.Ариунаа: Монголын Эрүүл мэндийн салбарын 56,000 эмч, эмнэлгийн ажилчдыг төлөөлөн бид энд сууж байна.

Бид ХНХ-ын сайд, Сангийн сайд, Эрүүл мэндийн сайд болон Засгийн газарт эрүүл мэндийн ажилчдын цалин хөлсийг хоёр дахин нэмэгдүүлэх шаардлагыг хүргүүлсэн ч өнөөдөр нэг ч байгууллагаас эргэж хариу өгөөгүй. Тиймээс бид шаардлагынхаа хариуг нэхэж байгаа юм.

Цар тахлыг дарах гэж эмч, эмнэлгийн ажилчид хоёр жил гаруй амралт, баяр ёслолыг мэдрэхгүйгээр сөхөртлөө ажиллаж буй. Төр засгийн бодлого шийдвэрийг хуулийн дагуу биелүүлсээр ирсэн ч өвчлөл ихсэхийн хэрээр үнэхээр туйлдаж байна.

Түүнчлэн  эрүүл мэндийн салбарын ажилчдын 90 гаруй хувь нь цалингийн зээлтэй. Гэтэл коронавирусээр өвчлөөд эмээ ч авч чадахгүй байдалд хүрлээ. Бид нэг удаагийн тэтгэлэг хүсээгүй бөгөөд өөрсдийн хийж буй ажил, хөдөлмөрөө шударгаар үнэлүүлэхийг л хүсэж байна. Бид өмнө нь ч иргэдийнхээ амь насыг хамгаалахын төлөө зүтгэсээр ирсэн. Цаашид ч бүхий л хүч чадлаа дайчлан ажиллана гэдгээ хэлье” гэлээ.

Тэдний зүгээс зөвхөн улаан бүсэд ажилладаг гэлтгүй бүх эмнэлгийн ажилтнуудын цалинг хоёр дахин нэм. Эмч, ажилтнуудын 90 гаруй хувь нь зээлтэй. Хамгийн хүнд ачааг үүрч буй салбарынхны цалинг ялгаварлалгүйгээр нэмэгдүүлж, төсөвт тусгаж өгөхийг шаардаж байгаа юм.