Улсын гуравдугаар төв эмнэлэг сүүлийн үеийн шинэ тенхнологийг нэвтрүүлж байна. Үүний нэг нь тархины судасны цүлхэнг судсан дотуур эмчлэх технологи юм. Манай улсад тэр дундаа УГТЭ-т ХБНГУ-ын "Katharinenhospital Stuttgart" эмнэлгийн Мэдрэлийн мэс заслын тасгийн эрхлэгч профессор Ханс Хэнкэс болон  ОХУ-ын В.А.Алмазовын нэрэмжит "Анагаах ухааны үндэсний судалгааны төв"ийн зөвлөх, профессор Андрей Евгеньевич Петров нар хүрэлцэн ирж, туршлагаа хуваалцан хамтран ажиллаж байна.

УГТЭ-ийн тархины судасны антиографийн оношилгоо эмчилгээний баг гадны зочин эмч, профессоруудтай хамтран 2019 онд 3 дахь удаагаа хамтарсанмэс засал хийгээд байна. Энэ хугацаанд тархины артерийн судасны хүнд хэлбэрийн том болон олон цүлхэнтэй эмгэгийг судсан дотроос нь цусны урсгал өөрчлөгч стент (имплант) тавьж эмчлэх судсан дотуурх мэс засал эмчилгээг нийт 12 хүнд амжилттай хийж гүйцэтгээд байгаа аж.

Мэс заслын үед болон дараа гарсан хүндрэлгүй эмчлүүлэгчдийн биеийн байдал сайжирч эмнэлгээс гарсан талаар албаныхан онцолсон юм. 

Дээрх хүнд хэлбэрийн тохиолдлуудад тавьж суулгасан нийт 308 сая орчим төгрөгийн зах зээлийн өртөг бүхий цүлхэнгийн цусны урсгал өөрчлөгч стентүүдийг ХБНГУ болон ОХУ-ын зочин профессорын хамтарсан багаас хандив болгосон төдийгүй мэс заслын эмчилгээг үнэ төлбөргүйгээр хийж гүйцэтгэсэн байна.
Олон улсад нэр хүнд бүхий профессор Ханс Хэнкэс болон А.Е.Петров нарын өндөр түвшний мэргэшсэн дээрх эмч мэргэжилтнүүд УГТЭ-ийн удирдлагатай уулзалт хийх үеэрээ Монгол улсад тархины судсан дотуурх мэс заслын үндэсний чадварлаг багтай хамтарч ажиллаж байгаадаа сэтгэл хангалуун байгаагаа илэрхийлээд цаашид Герман, ОХУ, Монгол улсын гурван талт хамтын ажиллагааг эмнэлзүйн болон сургалт, эрдэм шинжилгээний чиглэлээр улам өргөжүүлэн ажиллах хүсэлтэй байгаа уламжилж, төлөвлөсөн асуудлуудыг ойрын хугацаанаас эхлэн хэрэгжүүлэхээр тохиролцлоо.