Цэргийн бүртгэл эхэлсэнтэй холбоотойгоор нийслэлийн Цэргийн штабаас өнөөдөр мэдээлэл хийлээ.

Цэргийн бүртгэлийг Нийслэлийн хэмжээнд 2020 оны нэгдүгээр сарын 20-ноос хоёрдугаар сарын 7-ны өдрийг хүртэл зохион байгуулахаар болжээ.

Энэ талаар Нийслэлийн ЗДТГ-ын Цэргийн штабын ахлах офицер, дэд хурандаа Т.Мөнхбаяр  “Цэргийн бүртгэл ийнхүү хойшилж буй шалтгаан нь хүн ам, орон сууцны улсын ээлжит тооллого зохион байгуулагдаж байгаатай холбоотой.

Нийслэл энэ жил “Нэг хот, нэг стандарт” зорилт дэвшүүлэн ажилаж байгаа. Иймээс нийслэлийн 173 хороон дээр цэргийн бүртгэлийн ажил нэг стандарт, загварын дагуу зохион байгуулагдана. Цэргийн бүртгэлд дараах иргэд хамрагдана. 

• Цэргийн бүртгэлд 65 хүртэлх насны бэлтгэл дээд офицерүүд
• 60 хүртэлх насны бэлтгэл ахлах офицерүүд
• 55 хүртэлх насны бэлтгэл дунд офицерүүд болн ахлагч нар
• 18-50 насны иргэн эрэгтэйчүүд бүгд хамрагдана  

Цэргийн албаны тухай хуулийн 9 дүгээр бүлгийн 34 дүгээр зүйлд заасны дагуу Монгол Улсын иргэн эрэгтэйчүүд цэргийн бүртгэлд бүртгүүлж, цэргийн хөнгөлөлтийн үнэмлэх дээр тэмдэглэл хийлгэх ёстой” гэв.

Харин цэргийн бүртгэлд бүртгүүлээгүй тохиолдолд зөрчлийн тухай хуулийн 17-ын 3-т заасны дагуу хувь хүнийг 100 нэгжтэй тэнцэх хэмжээний мөнгөн төлбөр ногдуулах аж.