Монгол Улсын Ерөнхийлөгчийн ивээл дор зохион байгуулж буй “Морин хуур” үндэсний анхдугаар чуулган өнөөдөр Төрийн ордонд зохион байгуулагдлаа.

Чуулганаар үндэсний хэмжээнд Монгол төр морин хуурынхаа хөгжлийг төрийн бодлогод онцгой анхаарч, морин хуураа хөгжүүлэн дэлгэрүүлэх их үйлсийг бүх талаар дэмжиж, хамтран ажиллахаа Төрийн тэргүүн бүх оролцогчдод хандан илэрхийллээ. 

Чуулганы үеэр “Соёлын салбарын хөгжлийн бодлого, хэрэгжилт”, “Морин хуур ба хөгжмийн зохиолчдын уялдаа холбоо”, “Морин хуур урлал, түүнийг тойрсон асуудлууд”, “Морин хуур-Өнөөгийн байдал” сэдвээр хэлэлцэж, санал солилцлоо. 

"Морин хуур" үнэдсний анхдугаар чуулганы хүрээнд нийт таван удаагийн салбар хуралдааныг зохион байгуулсан бөгөөд салбарын хэмжээнд ЭШБХ-ыг мөн хийсэн байна. Тухайлбал, морин хуур урлал, хөгжмийн зохиол, багш нарын заах арга зүй, хөтөлбөр, хөгжимчдийн мэргэшлийг ахиулахад анхаарах асуудал, морин хуур судлал, түүхэн талаас нь салбар хуралдаанаар тус тус хэлэлцэж, саналуудаа нэгтгэсэн аж. 

Энэхүү чуулганаар морин хуурыг хамгаалах, хөгжүүлэх, түгээн дэлгэрүүлэхэд тулгарч буй асуудлуудыг хэлэлцэж, цаашид авч хэрэгжүүлэх арга хэмжээний талаар иж бүрэн хэлэлцүүлэг өрнүүлэв.

Чуулганы үеэр дэвшүүлсэн санал, зөвлөмжийг хэрэгжүүлснээр морин хуурыг сурталчлан таниулах, шинэ үеийнхэнд өвлүүлэх, чадварлаг хөгжимчдийг бэлтгэх зэрэг олон чухал ажлыг үе шаттайгаар хэрэгжүүлэх аж. Ингэснээр морин хуур Монголын үндэсний соёл, өв уламжлалыг түгээн дэлгэрүүлэх, үндэсний нэгдмэл үнэт зүйлийг бэхжүүлэхэд онцгой үүрэг гүйцэтгэнэ гэдгийг салбарыхан хэлж байв.