УИХ-ын чуулганы өнөөдрийн хуралдаанаар Үндсэн хуулийн цэцийн 2020 оны 02 дугаар дүгнэлтийг хэлэлцэн хүлээн зөвшөөрөх боломжгүй хэмээн үзэв.

УИХ-аас 2019 оны арванхоёрдугаар сарын 20-ны өдөр баталсан Монгол Улсын Их Хурлын сонгуулийн тухай хуулийн 6 дугаар зүйлийн 6.1 дэх хэсэг болон 6.3-т “Эвсэлд нэгдсэн бүх нам энэ хуулийн 6.1-д заасан шаардлагагын хангасан байна” гэж тус тус заасан.  Уг заалтуудтай холбогдуулан Сүхбаатар дүүргийн иргэн Р.Гончигдорж, Сонгинохайрхан дүүргийн иргэн Э.Төмөрбаатар нар Үндсэн хуулийн цэцэд ханджээ. 

Дээрх иргэдийн ҮХЦ-д хандсан мэдэгдэлд “Сонгуулийн тухай хуулийн 6.1, 6.3 дахь хэсгээр Монгол Улсын Үндсэн хуулийн 16-р зүйлийн 9 дэх заалтаар олгогдсон “сонгогдох” эрхээ мөн зүйлийн 10 дахь заалтаар олгогдсон эрхээрээ баталгаажуулсан, улс төрийн нам байгуулах эрхийнхээ дагуу УИХ-ын гишүүдийг сонгох сонгуулийн үйл ажиллагаанд оролцох эрхээ хязгаарлуулж байгаа нь УИХ Үндсэн хуулийн 19.1 дэх хэсэгт заасан үүргээ зөрчин, УИХ-ын сонгуульд оролцох эрхийг хязгаарлах замаар иргэдийн Үндсэн хуулийн 16.9 дэх заалтад заасан “сонгогдох” эрхийг зөрчиж байна” гэжээ. 

Үндсэн хуулийн цэцийн дүгнэлтийг УИХ-ын Хууль зүйн байнгын хорооны хуралдаанаар хэлэлцээд хүлээн зөвшөөрөх боломжгүй гэж үзсэн байна. 

Ингээд ҮХЦ-ийн 2020 оны 02 дугаар дүгнэлтийг хүлээн авахаас татгалзсан Байнгын хороодын санал, дүгнэлтээр санал хураав. Хуралдаанд оролцсон гишүүдийн олонх Байнгын хорооны дүгнэлтийг дэмжиж, ҮХЦ-ийн 2020 оны 02 дугаар дүгнэлтийг хүлээн зөвшөөрөхөөс татгалзлаа.

Чуулганы хуралдаан үргэлжилж байна.