Ариг банканд Монголбанкнаас бүрэн эрхт төлөөлөгч томилсон талаар мэдээллээ. Тус банканд өнгөрсөн баасан гарагт бүрэн эрхт төлөөлөгч томилсон юм.

Одоогоор Ариг банкны үйл ажиллагаа хэвийн үргэлжилж байгаа бөгөөд тус банк Төв банкнаас өгсөн үүрэг даалгаврыг биелүүлээгүй, банкны ТУЗ хуралдаж чадахгүй буюу эрх зүйн чадамжаа алдсан гэж үзэж байгаа юм байна. Иймд тус банкны хэвийн үйл ажиллагааг алдагдуулахгүйн тулд харилцагч хадгаламж эзэмшигчдийн эрх ашгийг хамгаалах зорилгоор дээрх шийдвэрийг гаргажээ. Тус банк бүрэн эрхт төлөөлөгчийг хүлээн авсан байна.  

Монголбанкны хяналт шалгалтын газрын захирал Н.Батсайхан: 

Бид Ариг банканд нөхцөлт удирдлагын арга хэмжээг авахаар боллоо. Банкны эздийн хооронд маргаан гарч, ТУЗ-ийн гишүүдээ бүрэн томилж чадахгүйд хүрсэн. 2019 оны эцсийн байдлаар тус банк өөрийн хөрөнгийн хүрэлцээ болон төлбөр түргэн гүйцэтгэх шаардлагуудыг хангаж байгаа юм. Өөрөөр хэлбэл банкны санхүүгийн үзүүлэлтүүд хэвийн. Иймд бид тус банкны удирдлагыг түр хугацаанд хүлээн авсан. Зохистой засаглалыг сэргээн, Монголбанкнаас өгсөн үүрэг даалгаврыг биелүүлсний дараа бүрэн эрхт төлөөлөгчийг эргүүлэн татна. Хуульд нэг хүртэл жилийн хугацаатай томилохыг зөвшөөрдөг ч бид энэ удаад гурван сарын турш ажиллуулна.

Иймд тус банкны харилцагч, хадгаламж эзэмшигчид тайван байж болно. Албан бус мэдээнд бүү автаарай. Энэ банк банкны системийн 0.3 хувийг эзэмшдэг.

Бүрэн эрхт төлөөлөгч гүйцэтгэх захирлын үүргийг гүйцэтгэнэ гэсэн үг. Энд банк татан буугдах тухай асуудал байхгүй. Бүрэн эрхт төлөөлөгчөөр чухам хэнийг томилсныг ил тод зарлах шаардлага байхгүй гэв.